A Coruña acolle estes días a celebración da décima edición do Galicia Fórum Gastronómico, cita de referencia en enogastronomía. Cada ano nela entréganse os seus Premios Picadillo, estando entre as persoas galardoadas neste 2025 o catedrático da Área de Nutrición e Bromatoloxía e investigador do Grupo de Investigacións Agrarias e Alimentarias (AA1) da Universidade de Vigo Jesús Simal.
Estes premios, que serán entregados este martes ás 16.00 h na clausura da cita, en ExpoCoruña, queren recoñecer “o traballo que persoas de diversas disciplinas e oficios viñeron realizando en prol da gastronomía galega a través da súa traxectoria profesional á que a miúdo dedicaron a vida enteira”. Jesús Simal, que conta cunha dilatada traxectoria académica e investigadora de máis de tres décadas, acadou o galardón na categoría Produtor, que recoñece “a mulleres e homes con oficios relacionados co mar e a terra que conseguiron crear produtos de prestixio para a gastronomía galega”. O galardón foille concedido concretamente “polo seu labor en prol da recuperación do cultivo da oliveira en Galicia”.